Glyggekäller

Dr Glyggekäller isch s Dehäim vonere Glygge. Do beräitet me sich duur s ganze Joor uff d Fasnacht voor. S wird zämme giebt, Laarven und Goschdüm wärde baschtlet, Ladäärne gmoolt und e mängi gmietligi Stund zämme verbrocht.

Marschiebig

In de Wuche voor dr Fasnacht isch in de Wälder rund um Basel e Huffe los. Glyggen und Guggemuusigen iebe, wie me glyychzyttig ka Muusig machen und im Glyychschritt laufe – das isch gar nid so äifach.

Vorfasnacht

An de Voorfasnachtsveraastaltige kunnt me so richtig in Fasnachts-Stimmig. Ob glungeni Raamestiggli, pointierti Schnitzelbängg, e tolli Gugge oder e schööni Nummere mit Drummler und Pfyffer – do findsch alles was di Fasnachtshäärz losst hööcher schloo.

Ladäärnevernissage

Am Oobe vorem Morgestraich gseen d Glygge zum erschte Mool d Ladäärne, wo se die näggschte drei Dääg an dr Fasnacht wird begläite. An dr Ladäärnevernissage bringe d Clique die Kunschtwärgg, no verhüllt, vom Ort wo sy gmoolt worde sin in d Stadt.

Morgestraich

Am Mäntig nachem Äschermittwuch, foot d Fasnacht mitem Morgestraich aa. Punggt 4i am Moorge göön in dr ganze Innestadt d Liechter ab. Denn heissts «Morgestraich, Vorwärts, Marsch!» Numme die vyyle Ladäärne und dausigi gläini Kopfladäärnli lüüchte de Fasnächtler bis zum Moorgegraue dr Wäg.

Goorteesch

Am Mäntig und Mittwuch Nommidaag isch dr Goorteesch. Do zäige d Glygge, d Guggemuusige, d Waggiswääge, d Scheesen und e Huffen Äinzelmassgen iiri Süüschee. Die vyyle Lütt, wo das farbige Schauspiil kömme go luege, hoffen uff en Orangsche, e Dääfi oder e Mimöösli. Mängmool gits aber au nummen e Hampfle Räppli ins Gsicht. Und wenns dunggel wird, denn ziehn d Glyggen und d Gugge no bis dief in d Nacht duur d Gasse vo dr Stadt.

Fasnachtszyschtig

Dr Zyschtig isch dr Daag vo de Kinder. Wild zämmegwürfleti Züügli, Drummel- und Pfyffergrubbe, Guggemuusige und Waggiswääge mache d Stadt zuenere grosse, faarbige Büüni. Zoobe finden ufem Glaarablatz, em Määrtblatz und em Barfiesserblatz die grosse Guggekonzärt statt, wo gschränzt wird, bis de Zuehörer d Oore waggle.

Ändsträich

Am Donnschtig am Morgen am 4i, genau 72 Stund nachem Morgestraich, het dr ganz Fasnachtszauber wider en Änd. D Fasnächtler sin mied und schlebbe sich nacheme letschte Schlummerdrungg haim ins Bett, wo si vo dr näggschte Fasnacht dräume

Bummel

Bevor s Fasnachtslääbe e gläini Pausen yyleggt, verbringe d Fasnächtler an eim vo de drei Bummel-Sunntige noonemool dr Daag zämme. Nach eme gläinen Ussfluug zieht me gegen Oobe, gsunntigt, e letschts Mool musizierend durch d Stadt